Por mor del 25 de Noviembre, Día internacional contra la violencia p'hacia la muyer, las muyeres y homes que somos parte d'AGORA facemos saber el nuesu más fondu refugu pa cola violencia de xéneru, en cualisquiera de las formas nas que se manifiesta: agresiones sexuales, acosu ou discriminación llaboral, prostitución, maltratu físicu ou síquicu, etc...
Al mesmu tiempu, asitiamos el nuesu llabor cotidianu col oxetu d'algamar un País Llionés, y un mundu, onde las muyeres y homes compartan, dientro la diversidá individual d'intereses, tolas actividaes que componen la vida y, polo tanto, refugamos las construcciones sociales que s'oponen a esta visión, como los roles de xéneru impuestos pol patriarcáu ou'l llinguaxe sexista.
Afirmamos que'l marcu llexislativu ye, y sedrá siempres, incapaz d'arrincar esta violencia de la sociedá , sinón s'acompaña d'una educación y concienciación pa la trasformación. Y nesti sen queremos incidir colos peguichos de la nuesa campaña "Igualdá de xéneru".
Nesti día, queremos amosar tamién la nuesa reconocencia pa col llabor desendolcáu na historia de la nuesa tierra al procuru de las organizaciones de muyeres, y por tolos y tolas que las sofitan.
A lo cabeiru, facemos un chamáu, en particular a los homes, pa participar nos actos y manifestaciones entamadas en dellas poblaciones llionesas col envís de celebrar esta data, como la ellaboración con arena de la fras "Día contra la violencia hacia las mujeres" na Plaza la Constitución de Zamora Ciudá, ou la manifestación que marchará dende la Plaza de Guzmán de Llión Ciudá.
No hay comentarios:
Publicar un comentario