martes, 28 de febrero de 2012

EL LLÏONÉS NUN YE CULPABLE.... PERU ¿Y LOS LLÏONESES?

Artículo del llionesista Elías Álvarez Rico, nel blog La revuelta sin respuesta




EL LLÏONÉS NUN YE CULPABLE



Va poucu, nun articulu nel diariu Público, falaban de rescatadores de pallabras. Pallabras que tandu en pelligru d'estición tienen de sere rescatadas cumu si fueran rehenes de cruentas gerras. 

Y lu ciertu ye que nun hai mueita distancia del estau d'algunas llinguas cul d'esos rehenes presos en xaulas sixiladas pur soldaos profesionales que fonun "educaos" pa odiar a los desemeyaos. 

Una prisión que'l llïonés, cumu llingua en pelligru, sufre dende va decadas, cuna custodia d'unos soldaos que se facen chamare castiellanos (ou hespañoles). Unos soldaos que tachan de castiellan mal falau, de llingua medieval y esfasada, ou outros calificatíus que ye miyor nun dicire pur nun ferire’l sentimientu de tantos llïoneses que falan ou quieren deprendere y falare una llingua que fou de reis. 

Una prisión de la que naide nun quixera sere rescatau, sinon que getare l'indultu purque denguna culpa nin delitu cometiera, que llucha pur sobrevivire ca vuelta en piores condiciones purque los llexisladores miran pa outru llau cuandu atopan dalgún resquiciu llegal que pueda salvare la llingua llïonesa.