jueves, 31 de marzo de 2011

OCEYU (OCEJO) LA PEÑA. FEISMU N´ESTÁU PURU

OCEYU (OCEJO) LA PEÑA
FEISMU N´ESTÁU PURU

Oceyu la Peña ("Ocejo de la Peña" en castellán) en Llión, ye ensín dubia unu de los requeixos más prestosos d´esta provincia del norte del Reinu de Llión (País Llïonés). Un pueblu allugáu na Montaña Oriental Llïonesa a 1160 mts. sobru´l nivel del mar, arrodiáu de montañas y que cunta cun malpenas 30 habitantes que resisten a duras penas, escontra tou, inclusu escontra las alministraciones, que lluenxe de sofitalos, paez que tentan de faceles rendise pa qu´abandonen estas tierras.



Si non, nun sedríamos a pescanciare, cumu n´estos tiempos, onde ye abegosu sobruvivire pa la xente de los pueblos, que lluchan pa caltenese n´esti llugar, las autuaciones de las alministraciones son mínimas y mueitas vueltas van escontra de lu que debiera sere l´ ameyoramientu de las condiciones de vida, yá de pur sí abegosas.



Un choupu del País
baixu la peña La Quebrantada

Unu de los recursos d´estos pueblos ye´l turismu, que nun siempres deixa beneficios direutos, peru siempres deixa dalgu. Pa eillu ye importante que las autuaciones seyan respetuosas cul mediu y l´entornu, pa caltenere l´arume d´estos pueblos peru dandu servicios a los sous pobladores, del mesmu mou que los conceyos debieran facer normas costructivas que respeten el xeitu llariegu de facere las cousas.



Pur tou lu dichu nun ye atalantable lu que dalgien fizu, nun sabemos quién, afincandu al llau del cañu, onde enantias aguardábanse las lleicheiras a l´aspera la recoyida, una parada d´autobús más propia d´Ordoñu ou del Paseyu Zorrilla, que d´un pueblu esqueicíu, nel fondu d´un val de montaña.sobru´l arrueyu la Duerna que crucia´l pueblu cumu una sierpe.


Pur si estu nun fuera abondu, engalánase l´abellugu los viaxeros cun un preciosu cuntenedor de papel d´un azul vivu, que sólu ye a entonare cul cielu los meyores días del branu. Esti exemplu nidiu de perfeuta integración cul alrodiu nun tará completu, cumu bon agasayu ensín una cinta que tou lu envuelva cunos colores roxu, mariellu y claru y los escudos del enxendru que tien que tare pur todas partes, pa que nun seyamos a esqueicere a quién debemos tan altas cuotas de desenrrollu.


Pur si surde la envidia nos pueblos la contorna , ponse un inventu asemeyáu nel pueblu d´al lláu (y nun me refieru al oxetu móvil, ni al poste formigón que cumpite cuna espadaña la igrexia de Santa Olaya la Varga.

A poucos metros de la parada,
siñálase una ruta de senderisu,
cun outru xeitu, dafeichu desemeyáu,
peru más integráu ensín dubia



Esti ye un exemplu de cúmu
pueden facese bien las cousas,
en Pinos, na comarca de Babia
(Montaña Oucidental llïonesa)


L´alrodiu del pueblu ye un llugar cun mueitos requeixos máxicos d´una naturaleza viva, apenas si cantiada pul home pa las xeiras llariegas a lu llargu los años y agora cul abondonu de las llabores del campu, tornan pulos suos fueros, traspasandu sebes y murias esbarrumbadas pul pasu del tiempu y l´esqueizu.



L´augua surde pur todas partes n´estos días, cuandu fúndense las ñeves tras las chuvias, y que dende cuantayá diera forma a esti piqueñu val onde un día asentónuse los homes pa dominar estas tierras y tentonun de domala pa regare los guertos.


La Peña furada,
cul sifón de La Duerna
al fondu´l barrancu




Averáu al pueblu alcontramos un butre agonizandu que nos sous postreiros intres amosóunos outra vuelta l´espreciu que las alministraciones amuesan pur estas xentes. Chamamos al teléfonu 112, de chamada gratuita y cobertura universal sigún, y ensín cansase de repetire, espubliza la Conseyería de Presidencia de la "Junta" de Castiella. Nun hai serviciu nel pueblu purque nun hai cobertura enchenu´l sieglu XXI. Esti ye´l resumen del conceutu de "seviciu públicu" que tenemos que sufrire los llïoneses que nun abandonamos el castru, pesia los romanos.



El ganáu y los mastines
son los únicos dueños del val





lunes, 28 de marzo de 2011

ROBRAS PUL CALTENIMIENTU DE LLANCIA


NON
A LA AUTUVÍA
EN LLANCIA

XÚNETE CUNA TUA ROBRA

LLUCHANDU ESCONTRA
LA BARBARIE ISTITUCIONAL

Entavía puedes robrar escontra la barbarie que tentan d´imponere las istituciones, cul refrendu de la Comisión de Patrimoñu autunómicu, dende Valladolid. Hai que torgar esti crimen premeditáu(yá sabían lu qu´había cuandu aprobonun el trazáu) pa finare cun outra de las nuesas ayalgas históricas y cun una posibilidá de desenrrollu económicu.

Puedes robrare, bien pur Internet, nel enllaz darréu:


onde alcontraréis un "link" pa la robra dixital; ou en cualisquier de las direiciones darréu:

EL TALLER – ARTESANÍA
C/ Cardiles nº3 -León

BAR EL CAPRICHO
Plaza de San Marcelo nº 9 – León

LIBRERIA PASTOR
Plaza de Sto. Domingo nº 4 – León

ALEJANDRIA LIBROS
C/ Fajeros nº 2 – León

LA CESTA BIOLÓGICA
Gran Vía de San Marcos, nº 51 – León

RESTAURANTE LUNIEGA
Avda. de Padre Isla, nº 30 – León

J.M. CENADOR, ARTÍCULOS DE PESCA Y COMPLEMENTOS
Gran Via de San Marcos, nº 53 – León

KIOSKO BAM BAM
C/ Daoiz y Velarde, nº 15 – León

LA PANADERÍA INTEGRAL
C/Cervantes nº 1 – León

ASOCIACIÓN EL TROVADOR LEONÉS
C/ Serrano, nº 18 – León

ESTANCO DE BOTINES
Plaza de San Marcelo – León

LEON FLOR
C/ Julio del Campo 8 – León.


jueves, 10 de marzo de 2011

EL LLIÓN DE GERMÁN GRACIA. PAISAXES Y PRESONAXES


EL LLIÓN DE GERMÁN GRACIA.
PAISAXES Y PRESONAXES

Na sala d´esposiciones del Palaciu Don Gutierre, podrá vese una prestosa esposición de semeyas del fotógrafu llïonés Germán Gracia, dende Marzu y 4 a Abril y 29, de llunes a vienres de 10:00 a 14:00 y de 18:00 a 21:00.

La esposición tien un piqueñu programa de manu, engalanáu cun una amuesa de las semeyas d´esti artista llïones, un programa que de xuru prestará, peru que torna a sere una oportunidá perdida pa espardire la nuesa llingua cun un testu billingue, cumu venía siendu costume nuna Conceyería que de momentu sigi chamándose de Cultura Llïonesa, pesia´l continuu espreciu que´l sou Conceyeiru faz a la que n´outros tiempos fou la sua mayor ayalga: la llingua llïonesa, y que pur outru lláu ye´l xeitu de nuesa cultura que más sofitu precisa dende las istituciones. Ni una sola llínia en tol programa, sólu de momentu, caltiénese el "logo" la Conceyería, si bien nun sabemos cuantu ye queda pa pasare a ser historia cumu tantas outras cousa, peru nun de manu de "la Junta", si non por mor de la presona que más tendría que facere pur defendere la sua cultura que ye la de tolos llïoneses.

Guei, preséntase una nueva esposición d´escultura llïonesa de deillos autores y una vuelta más Xavier Chamorru, vuelve a facere dexación de funciones y camuda´l títulu del ciclu de l´amuesa que dende l´añu 2008 vinía nomándose Escultura nel patiu del Palaciu, pula sua versión en castellanu, el mesmu día que l´Alcalde ya IU, proponen que´l Palaciu deixe de sere´el refuxu de la nuesa cultura y es que cun esti Conceyeiru (que robra cumu Concejal) nun fai falta nenguna sede, él sólu puede finare cuna nuesa cultura.


MARZU 2011. SANTURAL


MARZU

1.- Rosendu, Llión, Albinu, Sibiardu, Abundanciu;
2.- Heracliu, Lluciu, Secundila, Xenara, Inés de Praga;
3.- Medín, Emeteriu, Celedoñu, Ticianu, Marinu, Asteriu, Ágape, Marcia, Cunegunda;
4.- Casomiru, Uxeniu, Lluciu, Agatodoru, Elpidiu, Capitón, Efrén;
5.- Xuan Xosé de la Cruz, Nuesa Siñora d´África;
6.- Olegariu, Vítor, Vitorinu, Coleta;
7.- Felicidá, Perpetua, Gaudiusu, Eúbulu;
8.- Xuan de Dious, Xulián(Illán), Bermudu, Filemón, Arianu, Aurelia de Niza, Herencia;
9.- Xica (Francisca), Pacianu, Grigoriu, Dagobertu, Alvera;
10.- Macariu, Ciprianu, Cándidu, Cayu, Melitón, Codratu, Dionisiu, Simpliciu, Atalu;
11.- Oria, Ramiru, Uloxiu, Sofroniu, Utimiu, Aurea;
12.- Fina, Inocenciu, Teúfanes, Edunu, Mamilianu de Tebesa;
13.- Ramiru, Rudrigu, Cristina, Salomón, Macedoñu, Nicéforu, Patricia, Modesta, Ufrasia.
14.- Florentina, Matilde, Afrodisiu, Utiquiu;
15.- Madrona, Lluisa, Raimundu, Llonxinos, Probu, Sisebutu, César;
16.- Heribertu, Nadaya, Columba, Ciríacu, Hilariu, Tacianu, Heribertu, Abraham, Agapitu;
17.- Patriciu, Xosé d´Arimatea, Xertrudis de Brabante;
18.- Salvador d´Horta, Cirilu de Xerusalén, Anselmu, Trófimu, Ucarpiu, Xandru ( Alexandru);
19.- San Xosé, Apoloñu, Landoaldu, Amanciu y Quintu;
20.- Claudia, Nicetu, Martínu de D., Ambrosiu, Ciríaca, Xandra (Alexandra), Ufemia y Teudosia;
21.- Fabiola, Serapiu, Filemón, Domninu, Llupicinu;
22.- Outavianu, Bienveníu, Llea, Deugracias, Calínica;
23.- Xosé Oriol, Toribiu, Rebeca, Vitorianu, Frumenciu, Domiciu, Aquila;
24.- Timoláu, Agapitu, Simeón, Catuxa (Catarina, Catina) de Suecia, , Dionisiu, Rómulu, Berta;
25.- Encarnación, Gloria, Esmenaldu, Quirinu, Humbertu, Dula, Dimas;
26.- Brauliu, Cástulu, Teudosiu, Másima;
27.- Xandru (Alexandru), Rupertu, Filetu, Xandru (Alexandru), Llidia;
28.- Gindelina, Cástor, Gontrán, Malcu, Doroteu, Rogatu;
29.- Segundu, Cirilu, Ustasiu, Xonás.
30.- Quirinu, Xuan Clímacu, Quirinu, Cliniu, Régulu;
31.- Amós, Xamín (Benxamín), Amadeu, Balbina;



Nota: hai mueitos santorales y hai mueitos santos,
santas, vírxenes y mártires cada día.
En ca llugar cellébranse más unos qu´outros, de xeitu llariegu.
Na presente llista nun tan tolos que son.