jueves, 18 de junio de 2009

CUARTU DÍA DE LA LLINGUA LLÏONESA 2009

CUARTU DÍA DE LA LLINGUA LLÏONESA 2009

Apresentónunse guei las autividaes qu'esta fin de selmana se desenrollarán nel Palaciu Don Gutierre, correspondientes a una Xornada de Puertas Abiertas del Palaciu Don Gutierre y al IV Día de la Llingua Llïonesa. El Sábado, Xunu y 20, tendrá llugar la Xornada de Puertas Abiertas del Palaciu Don Gutierre, na cuala tolos ciudadanos podrán conocer esti edificiu, cellebránduse nel mismu a las 20,00 horas la inauguración d'una escultura de Don Gutierre rializada pul autor llïonés Juan Villoria. La rialización d'esta escultura correspuende a la carencia de la ciudá en materia escultórica que represente a los llïonesese illustres qu'enriquecieran la historia del Reinu de Llión. Darréu tendrá
llugar una autuación del Rabelista llïonés José Francisco Fernández Juárez.

El Domingu, Xunu y 21, cellebrarase'l IV Día de la Llingua Llïonesa cul que se rendirá homenax a la llingua vernácula del pueblu llïonés a partir de las 12,00 horas nel Salón d'Autos del Palaciu Don Gutierre. L'eventu costará d'una intervención del Conceyeiru de Cultura Llïonesa Abel Pardo y una lleutura poética a cargu d'autores en llïonés cumu Xuasús González ou Xairu Llópez, asina cumu de los outros escritores que cumu norma xeneral nun son a usar esta llingua cumu mediu d'espresión escritu peru que pa esta ocasión sí que participaran d'eilla, cumu Luis Artigue ou Miguel Escanciano. Acabada esta lleutura, procederase a la entrega de diplomas a tolos llïoneses que n'esti añu participonun nos cursos de llïonés p'adultos ou n'autividá estraescolar de Llingua y Cultura Llïonesa impartida nos colexos de Llión, pechánduse l'eventu cun una autuación del músicu llïonés Rodrigo Martínez qu'interpretará unas "Vaqueiradas", cantares tradicionales de la val de Tsaciana, y un pasacalles a partir de las 13,00 horas a cargu la Banda de Gaitas Ciudá de Llión.


No hay comentarios: