ARTÍCULU CENSURÁU EN "LA CRÓNICA"

Chéganos esti artículu qu´escoligamos, ya que siempres taremos escontra la prensa mercenaria y servil. Sólu llamentare qu´el sou partíu nun haiga teníu las arrancadeiras nin p´apresentase nin pa chegar a alcuedos cun outras formaciones llïonesistas. Esu daría más credibildá al testu darréu.

EL REINU DE LLIÓN N´EUROPA

“El reinu de Llión debe tare n’Europa cumu territoriu NUTS-2 y
nel Parlamentu de las Rexones"

"La campaña de las elleiciones europeas ta pasandu desapercibida ente los llïoneses. Yá nun ye que dengún partíu políticu d’ámbitu estatal lleve un llïonés nas suas candidaturas, sinón que nin siquier los políticos llariegos falan de las necesidaes d’esta tierra en materia europea. Lluenxe quedan yá las reivindicaciones en materia agraria, mineira, forestal ou ganadeira, peru ye que tampoucu naide nun diz nada de cuál ye’l papel que debe xugar el País Llïonés n’Europa. Dende seutores llïonesistas, apresentemos nun va mueitu un programa européu nel que la reconocencia del Reinu de Llión n’Europa yera ún de los oxetivos fundamentales. Esta reconocencia, promovida pul goviernu hespañol, lleva apareyada que l’Eurostat reconoza a Llión cumu una unidá estadística NUTS-2 (Nomenclature of Territorial Units for Statistics), y lu que ye más importante, que los Fondos europeos que se reparten en base a los índices de riqueza, tienen a los territorios NUTS-2 cumu suxetos cunos que se fain los cálculos. Los avantaxes que supondría pa tolos llïoneses esa reconocencia a estaya europea de las tres provincias llïonesa cífranse n’unas cantidaes que podrían superar los 1.000 millones d’euros, y que la pertenencia del Reinu de Llión a la Comunidad Autónoma de Castilla y León torgará que se nos concedan. Sedría interesante a lu menos conocere cuála ye la opinión que dende los partíos estatalistas tienen d’estas cousas, especialmente purque nas dóminas de crisis cumu la que sufrimos anguañu ye imprescindible que las ayudas a las que tenemos dreichu cumu llïoneses debíu a criterios cumu los índices de riqueza nun se pierdan, nuevamente, purque Llión nun ye una Comunidá Autónoma. Tamién sedría imprescindible l’allugamientu de PP y PSOE nu que respeuta a la representación del Reinu de Llión nel Comité de las Rexones européu. Dengún representante llïonés falóu tovía de pur quéi nos sous programas nun hai nin una llínia de defensa de los nuesos intereses.

Abel Pardo Fernández
Vicevoceiru del Grupu UPL nel Conceyu de Llión