DESIXIENDU LOS NUESOS DREICHOS, ONDE MEYOR

Cul envís de poner a prueba la política llinguística del Conceyu capitalinu, que presume de normalización y ata una Conceyería usa de feichu´l billinguismu, y en rellación cuna tema del mural de los Reis Llïoneses na fachada del INSS, decidí apresentare los documentos en llïones nel Rexistru Xeneral del Conceyu, nel edificiu d´Ordoñu II. Cuandu menos ye prestosu vere la cara de las empleyadas municipales cuya primeira reación ye dicire nun pescanciamos un res, pa darréu dicire que nun saben si pueden rexistralu purque nun ta en llingua ouficial. Tras unos intres de nerviosismu diciden resistralu ensin más. Conviduvos a facere la pueba. Aiquí vos deixu´l escritu:

AL CONCEYU DE LLIÓN
Negociáu de Urbanismu
C/ Ordoño II, nº 10
24001 Llión


-----------------------------------------------------, Profesión, cun DNI ----------- y domiciliu en ---------------------------------------------, antia esi Uerganismu comparez nel Espediente 267/08 y DIZ:

Qu´esta parte tuvu conocimientu de qu´en datas prósimas vase a proceder al derribu del edificiu situ na Av. Facultá de Veterinaria, nº 1 de Llión, onde tuvu la sede la Delegación Provincial de Llión del Institutu Nacional la Seguridá Social ata datas recientes, cul oxetu de construyire nel sou solar un nuevu edificiu onde dare serviciu a los ciudadanos d´un xeitu más cómodu y adecuáu a las necesidaes autuales del serviciu públicu.

Nel momentu la construción del edificiu autual que se va a esbarrunbare prósimamente, colocóuse na sua fachada principal un mural de grandes dimensiones realizáu a mou de mosaicu cun piqueñas piedras y allegóricu a los Reis de Llión, figurandu´l nome y la silueta de deillos d´eillos. Esi mural apaez robráu pur “Gavino”, esconociendu esta parte más datos sobru´l sou autor.

Debíu a la singularidá del dichu mural, únicu en tola ciudá de Llión onde se rinde un homenax a los Reis de Llión nun edificiu públicu y na sua fachada principal, ye deseu d´esta parte conocere si esi mural ta catalogáu y/ou posee dalgún gráu de proteición pa la sua conservación, asina cumu si se va a desmontare, conservare ya instalare de nuevu en dalgún llugar (fachada ou vestíbulu principales) del edificiu que se construya en llugar del autual, ou si va a instalase en dalguna outra sede del INSS n´esta ciudá. Nel casu contrariu, sedría de gran interés que pur esi Conceyu de Llión al traviés la sua Conceyería de Patrimoñu ou cualisquiera outra competente, entamárase cuna mayor urxencia posible las negociaciones oportunas cuna Direición Provincial de Llión del Institutu Nacional de la Seguridá Social pa que dichu uerganismu cediera a la Ciudá de Llión el citáu mural pa que pudiera ser istaláu en cualisquier outru edificiu ou espaciu públicu d´esta ciudá (cumu podría sere pur exemplu´l monumentu a los Reis de Llión situ na Glorieta de Guzmán el Bonu, a escasos metros del sou emplazamientu orixinal, y que se podría embellecere y ameyorar cuna adición d´esti mural dedicáu precisamente a los Reis de Llión), y eillu n´aras pa la conservación y puesta en valor d´un mural que pulas suas carauterísticas ye únicu tantu pul sou lláu artísticu cumu simbólicu, y que pulos años transcurríos dende la sua inauguración y pula sua privilexiada lloucalización ye parte del paisax urbanu d´esta ciudá y de la memoria coleutiva de los sous paisanos.


Pulu espuestu,

SOLICITU D´ESI UERGANISMU que tenga pur presentáu y almitíu´l presente escritu y, pur efeutuadas las manifestaciones que nel mismu se cuntienen, informe si´l mural esistente autualmente na fachada principal del edificiu situ na Avda. Facultá de Veterinaria, nº 1 de Llión ta catalogáu y/ou posee dalgún gráu de proteición pa la sua conservación, asína cumu si va a desmontase, conservare ya instalare de nuevu en dalgún llugar (fachada ou vestíbulu principales) del edificiu que se construya en llugar del autual, ou si va a istalase en dalguna outra sede del INSS n´esta ciudá y, nel casu contrariu, proceda a llevar a cabu las negociaciones necesarias cul Institutu Nacional la Seguridá Social pa qu´esi uerganismu ceda al Conceyu de Llión el citáu mural pa que pueda ser instaláu en cualisquier outru edificiu ou espaciu públicu de la Ciudá de Llión.
Asína procede en Llión, a Abril y 3 de 2009.