HOMENAX A DURRUTI

El pasáu, Outubre y 23, a las 9 la nueche, na Sala El Albeitear de la Ciudá de Llión, tuvu llugar un autu de lleutura de poemas cun motivu de las cellebraciones de homenax, d´esti llïonés universal y que cuminará´l día 20 cuna inauguración d´un monumentu dedicáu a la sua presona y a la súa vida. La nuesa collacia Lláncara, participóu cuna poesía que bien darréu:

Nun creigu que l´home seya llobu pal home
Nin na voz d´ordenu y mandu del que viste uniforme
Hai llobos qu´agullan a la lluna
Hai homes que cantan a la lluna
Peru nun sei si llevan uniforme
Nun hai duos días asemayáos, nun hai nada predicible
El airón desordena las fueyas na seronda
El niñu rebélase a la escontra´l sou cuerpu que medra
Y fácese home
El medrar ye desorden
Nun sei si los planetas xiran en órbitas perfeutas
Nun quieru ser planeta
Nin satélite
Nun hai llei qu´ordene a los amantes
La rutina ye´l orden
Hai versos calculaós y de rimas perfeutas
Que nun dicin un res
Hai xente que se despeina y que se mancha
Préstanme los lloucos y los poetas
Préstanme cuandu nun callan
Nun creigu na fe impuesta dende púlpitos y tribunas
Nin nos catecismos, nin nos mandamientos
Nin nos rïales decretos, nin nos bocyles oficiales
Nun creigu en dengún creigu
Sicasí, me prestan las buenaventuranzas

LLÁNCARA Outubre y 23 de 2009