DIARIO DE LEÓN
La editorial Filandón espubliza un nuevu poemariu en llïonés:
«El ñegru amor»
Ramón Rei empleya la fala de El Bierzu Altu
pa componer una oubra enchena de sentimientu
26/11/2009 E. Gancedo | Llión
«Pola nuesa caleya alantre/ vei soplando con fuercia l´aire,/ deixando entre las vieyas murias/ solombras escuras de naide». Asína escomencipia El soplu , unu de los poemas cuntenios en El ñegru amor , el nuevu llibru de versos en llïonés espublizáu pula editorial astorgana Filandón dientru de la sua coleición poética La ponte de Santa Catalina .
Cumu aseguran dende la editorial, «nesti intensu poemariu, l´autor d´orixe llionés Ramón Rei fai un recorrido pola xeografía emocional de la rellación amorosa, a traviés de breves, ou quiciás fugaces, paradeiras de versos, cuasi cumo fai davezu la propia vida». Sobru Ramón Rei informan los responsables de Filandón que se trata del seudónimu d´un llïonés, que, cumu outros mueitos de los nuesos paisanos, vive nel éxodu de Madrí. Pesia lu lluenxe , enxamás perdióu los llazos cuna sua tierra d´orixe, nin renuncióu a la raigame cultural que camienta que lu conformonun «personal y lliterariamente», y que lu xunen, amás, a deillas comarcas de Llión, especialmente el Bierzu Altu. Dafeichu, el xeitu llïonés qu´empleya n´estos versos ye´l propiu d´esos valles.
La emoción cuntenida, la presencia del paisax y la alcordanza de la presona amada son elementos básicos n´esta oubra. «Foi cumo una suave brisa/ que t´acaricia la cara./ Trayía un suave golor a agabanzas,/ a montunu cantruexu/, a carnosas grosellas,/ al dulce frescor del frambuesu...».
Esti ye´l cuartu llibru de la editorial y el segundu poemariu de la mesma. La empresa ya entama un nuevu llibru: Llogas carbayesas , de Oria de Rueda.
No hay comentarios:
Publicar un comentario