ABRIL Y 24.
DÍA LA INDEPENDENCIA.
HOMENAX A LOS HÉROES LLÏONESES
Cumu tolos años al averase la data d´Abril y 24, dende ComunidáLlïonesa.Ye -ComunidadLeonesa.ES- (Coordinadora d´Uerganizaciones, Asociaciones y Colecutivos) queremos convidar a tolos llïoneses a acompanganos na llariega cellebración del Homenax a los Héroes Llïoneses.
Cumu siempres comentamos, la elleición d´esta data nun ye casual puestu que´n Abril y 24, 1.808, la capital del Reinu de Llión, cul sou coronel D. Lluis de Sosa a la tiesta, fou la primeira ciudá d´Hespaña en llevantase escontra las tropas de Napoleón, mediante la proclama de Fernandu VII cumu rei y l´aniciu de llistas de reclutamientu pa lluchare escontra l´invasor.
Dende mediaos del sieglu pasáu, esisten na nuesa ciudá, sendas cais cunos nomes "24 de Abril" y "Luis de Sosa" que rememoran aquel feichu históricu, recoyíu, ente outros documentos de la dómina, na correspondiente Auta del Conceyu de Llión, tandu dichos sucesos nel orixe d´esti Homenax a los Héroes Llíoneses y de la colocación d´una placa nel Consistoriu la Plaza Mayor, nel Bicentenariu los sucesos, cul testu darréu:
«A los leoneses que en 1808 se levantaron por la libertad y la independencia de su país».
Al cayer esti añu la data d´Abril y 24 en martes, l´homenax cellebrarase a la tarde, aconceyándonos, a partir de las 19,30 horas, na plaza San Marcelu, escontra Botines, cunas nuesas bandeiras llïonesas.
P´amenizare l´aspera habrá música llariega y hacia las 20,00 horas, niciaremos el recorríu habitual pula cai Ancha, Plaza Regla, cai Marianu Dominguez Berrueta y Plaza Mayor onde se rializará la lleutura del Manifiestu y posterior colocación d´una corona llaurel pa la alcordanza de tolos Héroes Llïoneses, conocios y anónimos, qu´al traviés de la historia lluchonun y lluchan pa defendere la sua tierra, la sua cultura ya identidá.
Cumu outros años pedimos al Conceyu que se nos abra´l Consistoriu Vieyu pa podere rializare la lleutura dende´l balcón y asperamos que nun haiga problemas pa eillos, si bien, fasta la data nun tenemos recibida notificación dalguna sobru la tema.
¡¡¡TAIS TOOS CONVIDAOS!!!
No hay comentarios:
Publicar un comentario