VERSOS DE MADEIRA NEL PALACIU

Dende´l pasáu Noviembre y 27 y ata Xineiru y 15, 2010, el Palaciu Don Gutierre acoye una nueva oubra escultórica dientru´l proyeutu Escultura nel Patiu´l Palaciu, entamáu pula Conceyería de Cultura Llïonesa del Conceyu de Llión, cul finxu de dare cabida y proyeución al traviés d´esti espaciu a los escultores d´esta tierra, cumu parte clave del patrimoñu llïonés. L´autor de la mesma, Santocildes, amuesa al traviés del sou trabayu Versos de Madeira una oubra "llena de intensidad y personalidad, son mis versos sobre la vida hechos con madera". Los horarios de visita son de 9:00 a 21:00 horas los días llaborables.

Escultura nel Patiu´l Palaciu ye la mirada que quier achegase a la obra de cuantos desenvuelven la sua autividá creyadora n´esta tierra. Al traviés d´eilla, decatámosnos de las suas emociones, conocemos las suas propuestas, reconocemos la identidá de los paisaxes que nos son afines y dialogamos cul discursu narrativu que nos proponen nas suas bayurosas interpretaciones. Eillos son quienes representan la nuesa cultura nos desemeyaos foros. Poru, dende la Conceyería de Cultura Llïonesa, queremos sere sensibles a las suas creyaciones y sere cómplices de los sous sentimientos. De facere lu contrariu taríamos arrenunciandu a una parte importantísima del nuesu curiosu patrimoñu, ausentándunos del llegáu históricu asumíu qu´enrriquecienun cuantos creyadores yes precedieran.

Javier Chamorro
Conceyeiru de Cultura Llïonesa

Santocildes, el gran orfebre de la madeira´l Órbigu, el faedor de seres, sinificaos y emociones arrincaos del mesmu tueru de los árboles, de los fondos raigaños ou del airosu fueyascu de los xigantes de las veigas llionesas, a los que dota en cada trabayu de nueva vida y de nueva personalidá, tornóu a coyere la sua materia prima preferida, esa carne de la vexetación viva y palpitante, pa creyar una obra chena d´espresiones y proposiciones. A modu d´encaciñada rede de mensaxes escritos na tienra piel del vidul, Santocildes regálanos una cartografía mui presonal que nos fala, cun voz de vientu, savia tierra y lluz, d´aventuras xuntu al augua, d´épicas lluchas escontra las formigas, de llargas conversas cul vientu, de interminables tardecerines suañandu cula llínia roxa del horizonte. La memoria del vidul, cumu la del home, ye llaberíntica, ñudosa, morosina y llixera. L´artista fa versos cun eilla. Atendéi: ascúchase al árbol cuntare la sua hestoria.

Emilio Gancedo
Periodista y escritor
(adautáu pur L´Astiella)