ARGULLU LLÏONÉS ENSÍN COMPLEYOS

Semeya de ileon.com

(Cellebrandu la medalla de Suecia 2011)

ARGULLU LLÏONÉS ENSIN COMPLEYOS

Outru gallu cantaríanos si amosáramos la mitá d´argullu, cumu llïoneses, qu´amosóu Xuanín blandiendu la bandeira llïonesa ensín compleyos, enantias señeras y outras, a cada cual la de sou, peru nenguna menos que la de nuesu, y mueitu menos la cuartelada la vergoña, que tendría que esborriase de la faz de la nuesa tierra.

DE LA TIERRA AL AUGUA NEL PATIU DEL PALACIU

Na sala d´esposiciones del Patiu del Palaciu de Don Gutierre, entamáu pula Conceyería de Cultura Llïonesa del Conceyu de Llión, amuesa de pintura de l´artista llïonesa Isabela, que n´esta vecera, céntrase nos paisaxes llïoneses y podrá esfrutase dende Xineiru y 14, dica Febreiru y 4.

TIERRA - AUGUA

"Faltan l'aire y el fueu: perú ye que nun se ven. Nun se ven al traviés de los gueyos, perú pueden sentíse al empar qu'entisnan cada obra. Purque tan pur dientru. Tan emburriandu a los colores, onque seyan de TIERRA ou d'AUGUA.

TIERRA - AUGUA cumu chuvia de sentimientos, cumu masa de materia ella­borada, dende la emoción de contemplar estas tierras, estos árboles, esta ñevé, estas obras de tierra y augua, d'adobes, de teitos de paya, de piedra que soporta la vida, que la guarda mientras el futuru avanza p 'hacia nos. Purque nós facemos outra cousa que recibilu, apresaIu antias qu'escape, de las nuesas manos, antias de que seya yá pasáu.

Cada obra ye un tentu -a veces fantásticu- d´esi apresamientu que l´artista busca.

Una vez ascuchéi la voz del augua. Guei trayu tamién un son telúricu, recoyíu cuandu tentaba d'escapare pulas copas de los árboles, pulas cúpulas de los edificios, pulas cumes de los montes...

TIERRA - AUGUA ente aire (arrodiandu) - FUEU (afalandu)."

ISABELA.

(Testu en castellanu en "comentarios")

L´ÉSITU LA CONCENTRACIÓN

Semeya de Leonoticias.com del aniciu del autu

Esti vienres, surdíu na rede una convocatoria p´amosare a tou´l PP, nacional autonómicu y llocal, que nun ye tou tan guapu cumu eillos creyen, amosayes qu´en Llión nun tamos d´alcuerdu cul marcu autual autonómicu y nun vamos a parar ata algamare la nuesa autonomía la del País Llïonés.

La convocatoria nun fou bien planificada, peru pesia tou, fou un ésitu y algamóu amolar enforma a los populares que nun tuvun arrancadeiras pa caltener el programa previstu y vienunse forzaos, pula presión del grupu de llïonesitas a camudar la sesión fotugráfica planeada delantre del Hostal, desmontandu precipitadamente la estructura preparada al efeutu. La semeya fizunla de xeitu cobarde a la mesma puerta del Hostal rodiaos de la prensa y cun un fuerte dispositivu policial.

Las consinas más repetidas fonun:

¡AUTONOMÍA, PAÍS LEONÉS!

PP, ANTILEONÉS

PARTIDO POPULAR, FUNDACIÓN VILLALAR

Los medios falarán del ésitu de la cume "popular", y del bañu de multitues, peru chitan sobru outras cousas que nun presta lliere a los que pagan la publicidá (El Norte de Castilla ni noma a los llïonesistas na edición dixital), peru la verdá ye qu´entronun y salienun pula puerta d´atrás.

Semeyas que nun recoye la prensa,

del momentu en que la uerganización

dicide esmontar la plataforma preparada pa la sesión fotugráfica

Coincidiendu cuna concentración llïonesista, un grupu de mineros de la Hullera Vascu Llïonesa, sufríu la ira de la UIP(Unidá d´intervención policial) cun basa en Valladolid que s´empleyóu de xeitu esproporcionáu, cun esti grupu de mineros que vindicaban pul sou dreichu al trabayu, cousa que paez que yes esmolece dafeichu. Mentantu la xente del PP sonreyía nel interior del auditoriu.

Direútamente na tiesta ensín contemplaciones

DEL ACERU A LAS FORMAS, NEL PATIU DEL PALACIU

DEL ACERU A LAS FORMAS

Dientru del ciclu Escultura nel Patiu del Palaciu, entamáu pula Conceyeráia de Cultura Llïonesa, Eutiquio Quijada alpresenta l´amuesa "Del aceru a las formas", ata Xineiru y 28

"Una de las cousas que más nos chama la atención, seique, seya'l veré cumu de dalgu insinificante n'aparienia, nacen, medran y se tresforman toos aqueiilos seres y oxetos que nos arrodian. Dalgu asemeyáu ye lu que sientu you, n'este casu garrandu cumu "simiente" l'ACERU, duru y sobriu n'aparíencia, indeformable, pa faceré d'él cun temple, guelpes de firmeza y mueitu cariñu, tou aqueillu que me presta. Y quiciabes d'un xeitu egoísta, aproveichandu en cada guelpe, en cada quiebru, en cada xuntanza de las partes, la tresformación de dalgu tan resistente perú delicáu, tan sobriu na sua nacencia cumu fermosu nel sou cabu, del aceru a las formas."

Eutiquio Quijada

(Testu en castellanu en "comentarios")

LOS OUTROS CALENDARIOS

Escontra la desidia de las istituciones, los partios y los sindicatos,ente outros, sigen esistiendu llionesistas anónimos qu´aportan el sou granín de sable pa esta llucha desigual, y cun poucos medios facen lu que nun facen los que tendrían el deber de facelu.

Guei trayemos dous amuesas.

REINO DE LEÓN

¡UN PAÍS PARA VIVIR!

Nota al pía del calendariu

Las semeyas pertenecen a las comarcas llïonesas de Cabreira, Senabria, Tierras de Llión, Sayagu, Sierra de Francia y Ancares.

MCI NIVERSARIU DEL REINU DE LLIÓN

SIGIMOS TRABAYANDU

Nun faz falta recibire nenguna suvención pa sintise argullosu de la propia identidá na propaganda d´un negociu, outros autúan cun vergoña sólu pur miedu a ofendere al amu de PPuZela.

CALENDARIU "UFICIAL" 2011. XINEIRU

XINEIRU

1.- Añu Nuevu, Xesús y Nel

2.- Basíliu y Emma

3.- Florenciu y Xenoveva

4.- Priscilianu

5.- Miyana

6.- Día de Reis. Epifanía

7.- Amadeu y Raimundu

8.- Eladiu y Llucianu

9.- Iyán

10.- Pedru Urseolu

11.- Xiniu y Hortensia

12.- Modestu

13.- Gumersindu ya Hilariu

14.- Milagros

15.- Mauru

16.- Marcelu

17.- Alfredu y Antón Abá

18.- Beatriz

19.- Mariu y Pía

20.-Fabián y Sebastián

21.- Frutuosu ya Inés

22.- Gaudenciu y Vicente

23.- Armandu ya Idefonsu

24.- Felicianu y Xicu de Sales

25.- Elvira

26.- Gonzalu y Paula

27.- Xela

28.- Tomás d´Aquinu y Valeriu

29.- Pedru Nolascu

30.- Martina

31.- Xuan Boscu

JAZZ FEICHU EN LLIÓN 2010

JAZZ FEICHU EN LLIÓN

"Reconocíu cumu un espaciu cultural al serviciu de los nuesos ciudadanos, el Palaciu Don Gutierre acueye outra vuelta'l Ciclu de Jazz "Feichu en Llión", que n'esta ocasión cumple la sua Tercer Edi­ción, convirtiénduse n'una autividá musical imprescindible na pro­gramación qu'establece la Conceyería de Cultura Llïonesa pal Nadal.

"Feichu en Llión" carauterízase pur ser un Festival d'Hibiernu que vien estableciendu un programa nel que siempres tan presentes formaciones con nicios Llïoneses. Este añu inclúyense, en calidá de convidaos, a grupos achegaos al nuesu territoriu cumu ye'l casu de Keaton Dixie Band, de Salamanca, y J.V. & Carrió Latín Jazz, de la vecina Uviéu, Tamién, ya igualmente en calida de convidáu, participa Tangus Quintet, de Barcelona, que cunta cuna presencia d'un destacau escontrabaxista de la nuesa tierra, Javier Fierro.

Cul deseyu de qu'este apueste cultural entamáu pula nuesa Conceyería afaye una respuesta positiva ente tolos sigidores del 'Jazz, deséyayes unas Felices Fiestas."

Xavier Chamorro Rodríguez

Vicealcalde y Conceyeirul de Cultura Llïonesa

- Avientu y 27, ROBERTO BANDÍN QUARTET (Llión, País Llïonés)

Nuevu grupu del gitarrista llïonés Roberto Bandín, a mou de cuartetu, cuna participación de Pepe López a la batería, Carlos Rabanal al baixu y Emilio Saiz a la gitarra. El repertoriu compónese de temas orixinales y versiones d´standars del swing, el jazz y la bossa.

- Avientu y 28, JAVIER ALCALDE FUSSION TRÍO (Llión, País Llïonés)

Agrupación de música esperimental conducida pul baxista Javier Alcalde cun l´afán d´abrir nuevas brechas mediante mínimos recursos istrumentales, deixandu aire ente los istrumentos y executandu ideas cun más llibertá. El set list d´esti tríu ta compuestu pur temas fusión, afro, etc.

- Avientu y 29, TRI FULL JAZZ + LETICIA ROBLES (Llión, País Llïonés)

Formación de jazz compuesta pulos hermanos Roberto y Ángel González (pianu y batería respeutivamente) y l´escontrabaxista cubanu Luis Quiñones que n´esta ocasión autuarán xunta la reconocida cantante llïonesa Leticia Robles.

- Avientu y 30, SWING COMBO (Llión, País Llïonés)

Rosario Granell pon voz a esti combu que rinde tributu al xenial gitarrista Django Rainhard, formandu´l sou repertoriu conocidas y nun tan conocidas temas del mesmu (Undecided, Swing 34, Minor Swing, etc..)

-Xineiru y 3, KEATON DIXIE BAND (Salamanca, País Llïonés)

La Keaton Dixie Band convirtíuse nuna apuesta musical de gran calidá cun una cuidada puesta n´escena, que renovóu´l panorama musical na sua ciudá

- Xineiru y 4, TANGUS QUINTET (Barcelona, Cataluña)

TANGUS QUINTET ye unu de los grupos de tangu más estacáos nel panorama musical catalán autual. La íntima conexión ente los sous integrantes, la sua riqueza tímbrica, gran sensibilidá, madurez y capacidá emotiva facen de ca conciertu un acontecimientu únicu destináu a los sentíos y la emoción.

- Xineiru y 5, J.V. & CARRIO LATIN JAZZ (Uviéu, Asturias)

Formación musical cun cuatru años d´esperiencia nel Latin Jazz que tocóu na mayoría de llocales de jazz n´Asturias, oteniendu siempres bona acoyida y escelentes críticas ente los asistentes. Ta compuesta pur Jorge Viejo, Adrián Carrio, David Casillas, Leonel Duarte y Orestes Borbachán.

BONAS FIESTAS NADALIEGAS 2010

Facere clic sobru la semeya pa lliere´l testu

(Testu en castellanu en "comentarios")

BONAS FIESTAS NADALIEGAS

Finandu esti añu

del 1100 Aniversariu del Reinu de Llión,

dámosvos las gracias, pula vuesa collaboración

en tolos autos d´esta cellebración popular

y aprovechamos pa deseyavos

unas bonas fiestas nadaliegos

qu´asperamos esfrutéis na compañía

de los vuesos seres queríos.

Fina´l 1100 peru vien outru añu

pa sigire cuna nuesa vindicación

ata algamare´l nuesu finxu cimeiru.

Asperamos sigire cuntandu cul vuesu sofitu

pa continuare defendiendu

la nuesa cultura, la nuesa hestoria,

las nuesas tradiciones, el nuesu patrimoñu,

nuna pallabra: el nuesu País.

UN PRODUTU BIEN ENVASÁU

N´estos tiempos ye d´agradecere qu´entavía haiga xente que caltenga escrúpulos fasta a la hora d´envasar un ración de xanta. Cuandu tol mundu se vende pur cuatru perras pur mieu a la alministración que tenta de mercare sofitos cul dineiru de toos. La dinidá tien un preciu peru ta na tua manu rechazar aqueillos produtos que tan mal etiquetaos cun falsas marcas (cumu´l queisu castellanu, el vin de la Tierra de Castiella y Llión y outras mueitas) que tentan d´esborriare la tua identidá, l´empresariu tien que sabere que ganará simpatías na alministración peru que va a perdere clientes

Fuxe de las marcas inventadas
que tentan d´esborriare la tua identidá

DISCOS D´ENANTIAS L´ENXENDRU

DISCOS D´ENANTIAS L´ENXENDRU

(Discos anteriores al ejendro)

Mándanos un collaborador de L´Astiella estas semeyinas que nun son más, que las portadas d´unos vieyos "singles" que sólu cun velas unu ye a aldovinare que nun tan sofitaos pula "Junta". De feichu enxamás vieran la lluz si d´eilla dependiera, peru pur nun tare, nun taba ni inventáu esti enxendu autonómicu escontra natura que dalgunos s´empecinan en mantenere. Basten los pías de las fotos cumu comentariu.

¿Cúmu va a sere folklore del nuesu reinu

si ni taba inventáu?

¿Ónde tan las rodeas que tantu prestan

a oriellas del Pisuerga?

Esta pulas datas nadaliegas nas que tamos,

cun bon trax, xifra y tamborín

Esti ye un clasicu llocal

EL REI DEL CINISMU N´ESCLUSIVA

EL REI DEL CINISMU N´ESCLUSIVA

Tol goviernu de "la Junta" si pur dalgu ye a destacare, ye pul sou antillïonesismu, entamandu pula sonrisa del réximen, Silván, que cumu bon derniegu, ye´l que más méritos tien que facere ente tantu castellanu. Peru si dalgien destaca pula sua acritú, esi ye ensín dubia´l Voceiru del goviernu autonómicu y Conseyeiru de Presidencia, José Antonio de Santigo-Suárez, cun esa mirada perdida que nos alcuerda la de los sous pacientes cuandu tan pasaos de midicación y son a creyere que tan na posesión de la verdá sobru cualisquier dubia.

El pasáu domingu y cincu, tuvu a bien concedere, la sua primera entrevista a un mediu del enxendru autonómicu dende que ta nel sou cargu, feichu chamativu pa un voceiru. Vamos facer un piqueñu estrautu sobru la mesma:

1.- Lu primeiru ye que reconoz EL FRACASU DE LA SUA AUTONOMÍA que en 27 años nun algamóu´l sentimientu de Comunidá, pesia los millones invertíos en creyar una identidá artificial, al traviés de las alministraciones y las suas fundaciones satélites, claru que sigún él tou débese a l´autitú de los políticos y nun de los sous ciudadanos que tan gayoleiros dafeichu nel autual marcu autonómicu;

2.- Pur outru llau y cumu quien nun ye a querere la cousa y aproveichandu lu del Pisuerga, nun se farta de ripitire que ye un fiel defensor de la ENERXÍA NUCLIAR, vamos que si pur él fuera, una planta en cada provincia y ya de pasu un cimiteiru nuclear pa reciclare, qu´hai que ser eculóxicos;

3.- Metíos en farina, pa refrixerare tanta planta, ye necesariu mueita augua y sedrá pur esu que tien fixación cunas competencias de la Cuenca del Dueru, que Zapatero cedéu, cuandu pautóu´l cabeiru estatutu, qu´agasaya las competencias sobru´l Dueru, pesia ser esti un ríu cun auguas fronterizas, y pesia lu que ta escritu na Carta Magna. Ye tan cínicu que diz "la gestión del Duero se incluye en la reforma del Estatuto porque ES UNA DEMANDA DE LA SOCIEDAD DE CASTILLA Y LEÓN. Y tiene mucho sentido, porque si uno ve el mapa del Duero se da cuenta que la cuenca, que no el río Duero, dibuja, define perfectamente Castilla y León. EL AGUA ES FUNDAMENTAL PARA LA ORDENACIÓN DEL TERRITORIO. ¿Dónde pones una empresa que tenga que depurar? Donde está el agua. Pero, además, es el territorio de Castilla y León. ES QUE EL DUERO ES CASTILLA Y LEÓN." Outra vuelta los gueyos perdíos cumu un posesu.

La cousa ta nidia, ni El Bierzu, ni Sajambre y Valdeón, ni El Ebro burgalés ni la Sierra de Gredos son "Castilla y León" purque nun pertenecen a la Cuenca, peru nun vou a entrare nas consecuencias que tendrá pa la política de´infracadarmas hidráulicas, nin nel compromisu eculóxicu que carauteriza a l´alministración autonómica, nin nos dreichos d´esplotación de los acuíferos. El PSOE nun pudu facelu pior cuandu vendéu al nuesu País Llïonés que ye´l que más augua aporta a la cuenca, dende´l Tormes al Esla, pasandu pul Dueru Zamoranu, y tou esu ensín contare cuna Cuenca Miñu-Sil (...que´l Sil lleva l´ugua y el Miñu la fama);

4.- Cuandu fala de las competencias del augua, noma la ordenación del territoriu y estu nun ye casual purque más alantre diz "...lo primero que necesitamos es que haya menos victimismo, menos agravios y más autoestima, para empezar a hablar.... - huyendo de victimismos y agravios, empezar a ver que Castilla y León será una Comunidad más potente cuando los éxitos de Soria, los compartan los ciudadanos de Ávila; cuando los fracasos de León, los sientan como fracasos los ciudadanos de Valladolid. Mientras sigamos tirando del agravio, del descontento, del victimismo, así no fortaleceremos una Comunidad. Y, además, TENEMOS QUE SER TODOS MÁS GENEROSOS PARA SUPRIMIR LAS BARRERAS INTERNAS QUE HAY EN EL TERRITORIO Y ESO REQUIERE GENEROSIDAD POR PARTE DE TODOS LOS TERRITORIOS."

Éstu traduzse en que tan prontu algamen camudare la Constitución ou cuandu nun haiga quien se yes oponga las provincias van a pasare a la hestoria cumu tan faciendu cuna Gran Montaña Cantábrica Central pa espoliare aina más los recusros de la Montaña Oriental Llïonesa en favor de la Montaña Palentina. Nun somos a pescanciare los sacrificios que va tenere que facere Valladolí n´esa desintegración de los territorios hestóricos de la rexón llïonesa.

5.- Chama l´átención el talante democráticu del presonax que diz que respeta´l llïonesismu, nun cumu al nazismu ou al maltratu a las muyeres (¿Bona comparanza, non?) y p´amuesa un botón, purque esti home tán bien informáu sobru tolas temas de la Comunidá, pon d´exemplu de llïonesismu al exllïonesista Otero: "respeto el movimiento leonesista, ¿cómo no lo voy a respetar?, y TIENE SU PARCELA EN EL PARLAMENTO REGIONAL(???). En estos momentos hay dos parlamentarios del movimiento leonesista, ya no son de UPL, y ha llegado a haber tres. YO LO RESPETO. Pero, no, no me incomoda. FÍJESE, Joaquín OTERO siempre dice -˜YÁ QUE ESTAMOS EN ESTE BARCO VAMOS A REMAR EN LA MISMA DIRECCIÓN-", que es lo que hay que hacer. ASÍ ES COMO SE CONSTRUYE COMUNIDAD. NO PODEMOS PARNOS LA VIDA QUERIENDO REVISAR NUESTRA COMUNIDAD AUTÓNOMA."

Basten estas amuesas pa que vos fagais ideya de pur onde trascurríu la entrevista y hai mueitas más llindezas que nun tienen esperdiciu, asina cumu l´atitú del periodista que tamién sedría a comentare. Eiquí vos deixu unos enllaces pa quien seya a lliela completa. Que vos aproveche.

http://bit.ly/fz0GjX

http://bit.ly/gFCL9O

http://bit.ly/ii1BiS

PA LLIERE´L TESTU EN CASTELLANU ENTRAR EN "COMENTARIOS"

PARA LEER EL TEXTO EN CASTELLANO ENTRAR EN "COMENTARIOS"

EL RAMU CHEGA A "LOS ÁNGELES"

Cumu nun podía sere menos, el Ramu Llïonés chegóu ata la llïonesa cuesta la cai López Castrillón, pur tras la Diputación, onde ta´l bar "Los Ángeles". N´esta vuelta y pa tare bien axeitáu, engalanóuse de cacahuetes, anque nu ye lu llariegu.

LA MAZCARADA DEL CONCEYEIRU

LA MAZCARADA DEL CONCEYEIRU

Entama una nueva esposición nel Palaciu Don Gutierre, y n´esta oucasión nun podemos deixare de referinos a eilla cun murnia, nun pula propia esposición, si non pula costatación de lu que yá yéramos a vere nas cabeiras autividaes sofitadas dende la Conceyería de Cultura Llïonesa del Conceyu capitalinu: el progresivu abandonu del usu de la nuesa llingua pula parte de quien más debería facere pul sou caltenimientu y pul sou esporpolle. Nel programa de manu sólu figuran el títulu en lletra diminuta y na robra del Conceyeiru, amás de nos logutipos del Palaciu y de la Conceyería. el restu pur más, tornan al castellanu ¿Quéi pasóu?

Estu ye lu que pasa cuandu unu nun ye a creyere n´aqueillu que diz que defiende, cuandu pesan más outras razones, cumu las famosas razones d´Estáu, agora tócaye´l turnu a las razones elleutorales pul averamientu de los prósimos comicios, y el Conceyeiru tien miedu, miedu de que dalgien seya a camentare que ye un radical pur sofitare la llingua de nuesu. Una oportunidá d´harmanare la llingua de nuesu y averala a la nuesa llingua de Miranda, al traviés de la Ciudá de Bergancia que ye parte autiva na esposición. Outra oportunida d´amosare lu que ye la nuesa llingua y que ta viva ente nos. El Conceyeiru de Cultura Llïonesa nun sabe ou nun puede, peru lu que nunca nun debiera ye facere de menos al nuesu más sonce tesoru, que t´arrodiáu d´enemigos pur todas partes y él nun puede amagase. Entoncias ¿Quéi sedrá lu que venga darréu? ¿Finare cunas clases de llingua?

LLIÓN, CIUDÁ DE CONGRESOS

LLIÓN, CIUDÁ DE CONGRESOS

Nun tienen vergoña. A poucos metros l´Avenida Fernández Ladreda, onde quedonun interraos mueitos milllones pa que circule un taxi y un bus ca dous horas, y prósimos a la zona onde va vere la lluz, el Llión del sieglu XXI, sigun eillos, estu ye lu que puede vere cualisquier que s´avere al Estadiu Hispánicu, onde van tolos niños de Llión a prauticare dalgún deporte nas escuelas municipales. Estu sedrá lu que ye a pescanciare´l conceyeiru d´Urbanismu, Mediu Ambiente y Desenrrollu Sostenible, D. Francisco Javier Gutiérrez González, cumu una ciudá moderna abierta al futuru, ou quiziás sedrá que nun tuvu tiempu p´arreglar esti requeixu que deixa vere nidiamente las priocupaciones del Conceyu pula vida nos barrios periféricos de la ciudá. La mesma ciudá que va a abellugare milenta mil de turistas y congresistas.

XORNADAS DEL CALDEIRU 2010

Cumu esti añu L´Astiella nun pudu asistir a las Xornadas del Caldeiru del 2010 en Riañu, valga estu cumu homenax y agradecimientu a tolos uerganizadores, participantes y asistentes, asina cumu tamién a toos aqueillos que comparten la mesma ideya, pesia tou y toos.

Pulu mesmu vamos a escolingar esti videu onde podréis vere la imaxe del horror de la ensín razón, que pesia los años trascurríos, nun puede deixar a naide indiferente: la supuesta prosperidá d´unos nun puede escansare na esgracia d´outros.

Voladura de la torre la igrexia de Riañu

PARAMESES DE BERCIANOS Y.... LLÏONESES

"Somos así" un programa de la máquina de propaganda del enxendru autunómicu, cyl7, empeñáu n´inventase una identidá artificial, y pesia la sua continua llabor de manipulación esinformativa, nun puede torgare cometere deslices que ñegan tou aqueillu que tentan transmitire, esta vuelta en Bercianos del Páramu. P´amuesa un botón n´esta imaxen, ensín más comentarios.

UNA ESCULTURA ESCONTRA LA SAMA-VELILLA

Dientru del ciclu d´esposiciones "Escultura nel patiu´l Palaciu" entamada pula Conceyería de Cultura Llïonesa del Conceyu de Llión, n´esta ocasión l´artista materializa un glayíu escontra esti atentáu mediuambiental promovídu pulas elleútricas cul sofitu cómplice de las alministraciones, cul goviernu de Zapateiru a la tiesta.

"Dende va deillos años, las tierras Llïonesas, los sous miyores paisaxes montañeses, tienen una menancia que, cumu una espada de Damocles, pende sobru eillas y pon en grave peligru la sua integrídá, la sua fermosura y los sous xeitos de vida futuros, basaos na sostenibilidá y na preservación de los sous valores naturales, históricos y culturales.

Ye un compromisu moral que toos: inteleutuales, artistas, científicos, políticos, ciudadanos... seyamos a axuntanos pa faceye fronte, pa defenderé la tierra que nos abelluga purque, si nun lu facemos, enormes torres sedrán semadas nos miyores paisaxes del nuesu monte... durante 88 Km y un enorme llátigu de 800 Kv fustigará tou vestixu de vida al sou algame, virtiendu la sua contaminación visual y eleutrumanética n'unas tierras y sobru xentes cuyas vidas dependen de la sua integrídá natural."

Diego Segura

XV SELMANA MICULÓXICA DE BOÑAR

XV SELMANA MICULÓXICA DE BOÑAR

Outru añu más torna la Selmana Miculóxica de Boñar, entamada pul Centru de niciativas turisticas "San Isidro"(Llaburandu pula Comarca del Altu Porma), de manu del sou Presidente Enrique Alonso, y qu´esti añu cunta cul progama que vien darréu:

CONFERENCIAS Y OUTROS AUTOS

Outubre y 26, MARTES: Dende las siete a las nueve la tarde nel salón d´usos múltiples -nas antiguas escuelas-, cedíu pul Conceyu de Boñar, recoyida de bandeixas pa la participación nel CONCURSU ESPOSICIÓN DE FUNGOS.

Outubre y 27, MIÉRCOLES: Hacia las siete la tarde se procederá al reconocimientu y valoración de las bandeixas alpresentadas al Concursu-Esposición de Fungos, pul xuráu competente, quien alxudicará los premios d´alcuerdu cunas BASAS.
A las ouchu la tarde nel citáu salón, inauguración, dafeichu, de las xornadas, que sedrán alpresentadas pul Presidente del CIT. "San Isidro", Enrique Alonso. Darréu intervendrá José Ángel González Cuenca, de "l´Asociación Micológica San Jorge" que pronunciará una conferencia cuna tema "LAS MEJORES SETAS COMESTIBLES Y POSIBLES CONFUSIONES"


Outubre y 28, XUEVES: a las ouchu la tarde, charla conferencia pronunciada pur Julián Cerezal Fernández, Presidente de "l´Asociación Micológica San Jorge", qu´albordará la tema sigiente: "LOS HONGOS EN LA VIDA COTIDIANA DEL HOMBRE".


Outubre y 29, VIENRES: A las ouchu la tarde, cabeira conferencia cuna leición especial sobru "HONGOS RAROS EN LA NATURALEZA", que sedrá pronunciada pur Juan Antonio Sánchez Rodríguez de " l´Asociación Micológica "San Jorge" de Llión.


Outubre y 30, SÁBADU: A las siete y media la tarde, nel citáu Salón d´Usos Múltiples del Conceyu de Boñar, Peiche de las xornadas cuna posible autuación d´ un Grupu Musical proporcionáu pul Institutu Llïonés de Cultura, de la Excma. Diputación Provincial de Llión y entrega de premios a los participantes nel Concursu Esposición de Fungos.

Los convidaos y xornadistas que sigienun la Selmana Miculóxica, sedrán agasayaos nel Hostal "NISI" cun una degustación de platos de fungos ellaboraos pa la ocasión.

EL TRAX CEREMOÑAL DEL ÓRBIGU NEL XIX

Facere clic sobru las semeyas pa ver al detal

Entamu del Conceyeiru de Cultura Llïonesa

"La indumentaria, danos cono­cencia abonda pa sabere de la rialidá cultural, política y social de los conceyos nos diferentes tiempos que marca la historia, ya igualmente, fálanos de la xïugrafía y de los paisaxes qu'habitonun las xentes que los llevonun. Rellatan las suas miserias ou las suas allegrías.

Poucas yeran las posibilidaes de los nuesos campesinos nel sieglu XIX. El decoru y abrigu de la sua vergoña, llimitábase a la roupa de llabor y a la ceremoñal, llimitáu'l sou usu pal día de boda, de fiesta y a veces nel cabu de las suas vidas cumu mortaya.

Javier Emperador propon un averamientu al Traxe ceremo­ñal del Órbigu y el sou arrodiu nel sieglu XIX cuna visión de quien sustenta una fonda conocencia del espaciu xïugráficu pul que discurre'l calce d'este ríu Llïonés, un territoriu bien achegáu a él.

Outubre, ye'l mes que convoca a los Llïoneses a un alcuentru cunas suas tradiciones. Ye tiempu d'ablanos, carros engala­naos y pendones al asomu de los primeiros fríos.

La Conceyería de Cultura Llïonesa, una vuelta más, cul envís d'afalare cuantas autividaes seyan precisas pa la conocencia de la nuesa cultura, quier achegar a los nuesos ciudadanos las singularidaes d'esta tierra y n'esta ocasión faelu al traviés del recursu patrimoñal de la indumentaria tradicional Llïonesa."

Javier Chamorro Rodríguez

Vicealcalde y Conceyeiru de Cultura Llïonesa

Facere clic sobru las semeyas pa ver al detal

Alpresentación

"Al traviés d'esta esposición preténdese rializar un averamientu a lu que, nel sou momentu, debiéu seré la indumentaria tradicional nel sou usu ceremoñal nel Órbigu y l'arrodiu prósimu (Maragatería, Páramu, Cabreira y Tierras Bañezanas) durante la primer mita del sieglu XIX. Un trabayu ou amuesa d'investigación que se basa en piezas testigu d'esa domina. Una documentación estrayida de desemeyaos archivos, amas de partiyas ya in­ventarios de bienes, asina cumu d'outros estudios documentales basaos n'autores d'ese tiempu, viaxeiros, grabaos, fotugrafías, etc.

La tipuloxía d'esta vestimenta nun quier seré definitoria ou determi­nante d'un xeitu únicu (uniforme), sinon que tenta d'amosare qu'esistían du­rante este períodu mui bien de variantes. Lu ciertu ye que, sigún evoluciona'! sieglu XIX ya igualmente evoluciona la moda, van quedandu dalgunas piezas qu'escomencipian considerase, pur parte de los nuesos guelos, prendas que formaban parte del TRAXE ANTIGUU. Estas formas y prendas que se van afitandu faen que surda un xeitu de traxe que ye usáu sola y simbólicamente n'acontecimientos mui especiales y sinificativos. Ye, en definitiva, lu que somos a chamare TRAXE CEREMOÑAL.

Nel Órbigu y Maragatería ye aú fundamentalmente sigienun utiüzandu esta clas d'atuendu, costituyíu pur complementos y elementos mui arcai­cos, y onde caltuvienun un sinificáu d'índole representativu, al cual s'incorporan, sigún la ocasión, atavíos y útiles que contribuyen a la sua idea­lización.

En repasandu l'aneudotariu históricu del usu d'esta indumentaria, te­nemos que nos remitir a la boda d'Alfonsu XIII, ou a la despidida de la Llexón Cóndor nel Llión de 1939. Tampoucu l'arte nun fou ayenu a la sua represen­tación plástica. Artistas cumu Sorolla ou los fotógrafos Laurent y Ortiz Echa-güe, ente bien d'eillos, contribuyenun al sou espardimientu.

N'esta esposición, el visitante podrá alquirire globalmente una infor­mación arriquecedora y, al empar, una visión xeneral sobru esta peculiaridá del vestiré n'unas comarcas Llïonesas de reconocíu acervu tradicional, etnugráficu y cultural, que nun ye deixará indiferente."

Javier Emperador Marcos

Comisariu de la Esposición

Facere clic sobru las semeyas pa ver al detal

Facere clic sobru las semeyas pa ver al detal

Semeyas del programa de manu de la esposición